Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 349 Hüküm no: 348 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin evini İbrahim Odabaşı’ya sattığı Mahmiye-i İstanbul’da Toptaşı Mahallesi’nde sâkin Mehmed Çelebi b. Ahmed nâm kimesne meclis-i şer‘-i şerîf-i enverde işbu sâhibü’l-kitâb İbrahim Odabaşı b. Bektaş nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde silk-i mülk-i sahîhimde münselik olup mahalle-i mezbûrede vâki‘ bir tarafdan Okumuş Ümmühan Hatun ve bir tarafdan Hadice Hatun menzilleri ve bir tarafdan [78b] müte‘ehhilîn odaları ve bir tarafdan tarîk-i hâs ile mahdûd iki bâb tahtânî oda ve bir sofa ve bahçe ve havlu ve kenîfi müştemil mülk menzilimi cümle tevâbi‘ ve levâhık ve kâffe hukūk ve merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz yetmiş beş guruşa mezbûr İbrahim Odabaşı’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz yetmiş beş guruşu mezbûr İbrahim Odabaşı yedinden tamamen ahz u kabz eyledim. Fîmâ-ba‘d menzil-i mahdûd-ı mezkûr mezbûr İbrahim Odabaşı’nın mülk-i müşterâsı ve hakk-ı sırfı olup kat‘â benim alâka ve medhalim kalmadı. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: El-hâcı Halil Odabaşı b. İbrahim, el-Hâcı Mehmed Efendi b. ( ), Mustafa Halîfe b. Halil, Müezzin Mustafa Halîfe b. İbrahim.