Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 108 Hüküm no: 132 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mariyora’nin Yahudi Matatya’daki alacağının tahsili Ma‘rûz; Vâki‘ olan mevâddı istima‘ içün taraf-ı şer‘den irsâl olunan Ahmed Efendi dâ‘îleri Üsküdar’a tâbi‘ Kuzguncuk karyesine varıp ba‘de akdi’l-meclis Çenger karyesi sâkinelerinden zâtı vech-i şer‘î üzere mu‘arrefe olan Mariyora Nasrâniye hasmı Matatya Yahûdî muvâcehesinde Kuzguncuk karyesinde vâki‘ beher mâh beşer guruş ücret ile mülküm olan menzilimi mukaddemâ mezbûr Matatya istîcâr edip târih-i i‘lâm şehri gāyetine gelince yirmi altı ayda müctemi‘ olan yüz otuz guruş icâremin kırk sekiz guruş bir rub‘unu işbu hazır bi’l-meclis Ali Beşe’ye ve yüz on parasını bana teslîm edip bu vechle elli bir guruşu ahz ü istifâ etmekle bakī yetmiş dokuz guruş icâremi taleb ederim deyü ba‘de’d-da‘vâ mezbûr Matatya cevâbında menzil-i merkūm icâresinden bâkī yetmiş dokuz [guruş] müdde‘iye-i mezbûreye deyni olduğunu bi-tav‘ihî ikrâr ve i‘tirâf etmeğin ikrârı mûcebince meblağ-ı bâkī yetmiş dokuz guruşu müdde‘iye-i mezbûreye edâya mezbûr Matatya Yahûdî’ye tenbîh eylediğini mezbûr dâ‘îleri mahâllinde tahrîr ba‘dehû ümenâ-i şer‘le gelip alâ-vukū‘ihî inhâ ve ihbâr eylediğini bi’l-iltimâs huzûr-ı âlîlerine i‘lâm olundu. Fî 28 Recebi’l-ferd sene 1154