Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 109 Hüküm no: 135 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Sadi’nin Üsküdar’daki sütçülere kethuda tayin olunduğu Der-i devlet-mekîne arz-ı dâ‘î-i kemîne budur ki; Medîne-i Üsküdar’da vâki‘ sütçü kârhâne ustalarından el-Hâc Mustafa ve el-Hâc İbrahim ve el-Hâc Ali ve Ahmed Beşe ve Ömer Beşe ve satıcı tâifesinden Cebeci Hüseyin ve Kara Mehmed ve Osman ve İbrahim ve es-Seyyid Osman ve el-Hâc Hasan ve el-Hâc Abdullah ve sâir müseccelü’l-esâmî cemm-i gafîr meclis-i şer‘a ihzâr ettirip san‘at-ı merkūmede kat‘â alâkası olmadığı ikrârıyla müte‘ayyin olan Ali Beşe b. İbrahim muvâcehesinde merkūm Ali’nin san‘at-ı merkūmede alâkası olmayıp kethudâlık iddi‘âsında her birimizi ta‘cîz ve celb-i mâl sevdâsıyla gerek usta ve satıcıları rencîde ve nizâmımızın ihtilâfına bâ‘is olup mezbûr Ali’den bir vechile hoşnûd ve râzılar değilleriz deyü mezbûr Ali’nin muvâcehesinde teşekkî etmeleriyle mezbûr Ali kethudâlıkdan ref‘ olunup cümlenin muhtârı olup kadîmi usta olan işbu râfi‘u refi‘a-i ubûdiyet Osman b. Sadi dâ‘îleri üzerlerine kethudâ nasb ü ta‘yîn buyurulup yedine berat-ı âlîşân i‘tâ ve ihsân buyurulmak ricâsına arz ve i‘lâm olunmasını iltimâs etmeleriyle ol ki vâki‘ hâldir pâye-i serîr-i a‘lâya arz ve i‘lâm olundu. Fî 17 Recebi’l-ferd sene 1154