Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 110 Hüküm no: 138 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekçilik yapan Bayram’ın eski ortakları Abraham ve Bogos’daki alacaklarının tahsili Ma‘rûz; Üsküdar’da gazzaz tâifesinden Bayram nâm Yahûdî şerîkleri Abraham ve oğlu Bogos zimmîler ile ba‘de’t-terâfu‘ târih-i i‘lâmdan yüz gün mukaddem san‘at-ı merkūmede şerîkler olmalarıyla fesh-i şirket ve ma‘rifet-i şer‘le hesapları görüldükde müdde‘î-i mezbûrun mal-ı şirketinden kendi mâlı olan bin altı yüz doksan beş buçuk guruşun bin yüz elli iki buçuk guruşunu mukaddemâ ahz ve istifâ, bâkī asl-ı mâlından beş yüz kırk üç guruşunu mesfûrân Abraham ve Bogos nâm zimmîler kendi mesâriflerine sarfla istihlâk etmeleriyle hâlâ meblağ-ı bâkī-i mezbûr beş yüz kırk üç guruşu mezbûrân Abraham ve Bogos’dan taleb ederim deyü da‘vâ ettikde mezbûrân dahi cevaplarında hâl minvâl-i muharrer, zimem-i nâsdadır deyü ikrâr ve kendi sermâyelerinden asl ve fâiz olanları ahz u kabz eylediklerini ikrâr ve i‘tirâf edip müdde‘î-i mesfûrun asl-ı mâlından zimem-i nâsdadır deyü def‘ etmeleri def‘-i sahîh olmayıp meblağ-ı mezbûr beş yüz kırk üç guruşu ikrârlarıyla edâya ba‘de’t-tenbîh târih-i i‘lâmdan yirmi bir gün tamamına değin edâ eylemek üzere ta‘ahhüd ettiklerinde müdde‘î-i mezbûr Bayram dahi merkūmânı ber-vech-i muharrer tecîl eylediği Üsküdar’da ba‘de’t-tescîl bi’l-iltimâs huzûr-ı âlîlerine i‘lâm olundu. Fî 6 Şa‘bân sene 1154