Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 351 Hüküm no: 351 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çatalca’da Badıllı cemaatinden bazı kimselerin eski zabitleri Ali Bey’in zimmetini ibra ettikleri Havâss-ı Refî‘a kazâsı muzâfâtından Çatalca nâhiyesinde sâkin olup Badıllı cemâ‘ati tâ‘bir olunur işbu ashâb-ı kitâb Hüseyin b. Mustafa ve Hasan b. Resul ve Resul b. İbrahim ve Mehmed b. Hasan ve Ali b. Hüseyin ve Hüseyin b. Ali meclis-i şer‘-i şerîf ve mahfil-i dîn-i münîf-i ezherde cemâ‘at-i mezkûrenin aşîretbeyi olup ber-vech-i iltizâm zâbitleri olan Ali Bey b. Murad nâm kimesne mahzarında her biri takrîr-i kelâm ve tâ‘bir ani’l-merâm edip mûmâ-ileyh Ali Bey on beş seneden mütecâviz ber-vech-i iltizâm zâbitimiz olup bâ-fermân-ı âlî ve sûret-i defter üzerimize edâsı lâzım gelen hukūk ve rüsûmât ve tekâlif-i sâiremizi cem‘ ve tahsîl ve ahz u kabz etmişidi hâlâ mezbûr Ali Bey ber-vech-i muharrer umûrumuzu rü’yet ve ikāmetden ferağ ve kasr-ı yed ve fîmâ-ba‘d umûrumuza müdâhale etmemek üzere ta‘ahhüd etmeğin sinîn-i mezkûrede cânib-i mîrî ve kendi için zikrolunan sûret-i defterden ziyâde bir akçe ve bir habbe zimmetinde hak ve müstehakkımız zuhûr etmemeğin husûs-ı mezkûra ve târih-i kitâba gelince sâir beynimizde cereyân eden ahz u i‘tâya müte‘allika âmme-i da‘vâdan mezbûr Ali Bey’in zimmetini ibrâ ve iskāt eyledik dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Tahtacı Mehmed Ağa, Kādızâde İbrahim Efendi, Abdullah Çelebi b. Mustafa, Mustafa Çelebi [b.] Abdullah, Mustafa Çelebi b. Hasan.