Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 352 Hüküm no: 352 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Homasi ile boşandığı eşi Hava bt. Oseb’in aralarındaki eşya davasında sulh oldukları Mahrûse-i Galata a‘mâlinden kasaba-i Beşiktaş’da Sinanpaşa Mahallesi mütemekkinlerinden Homasi v. Ayvaz nâm Ermeni meclis-i şer‘-i hatîr-i lâzımü’t-tevkīrde zevce-i sâbıkāsı işbu sâhibetü’s-sifr Hava bt. Oseb nâm Nasrâniye muvâcehesinde ikrâr-ı tâm ve takrîr-i kelâm edip mesfûre Hava zevce-i menkûham olup beynimizde hüsn-i mu‘âşeretimiz olmamağla bi’t-terâzî bundan akdem müfârakat edip zevciyyetde kat‘-ı alâka oldukdan sonra mukaddemâ diyâr-ı âhara gittiğimde ba‘zı eşyâ-i ma‘lûme-i mütenevvi‘amı ketmetmişidi da‘vâ, ol dahi benden ba‘zı eşyâ-i memlûkemi ahz etmişidin deyü da‘vâya tasaddî etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî beynimize muslihûn tavassut edip her birimiz li-sifrin zimmetini meccânen ibrâ etmek üzere sulh eylediğimizde ben dahi sulh-ı mezbûru kabûl hukūk-ı zevciyyete ve târih-i kitâba gelince gerek zevciyyetden kāim iken ve gerek ba‘de ahz u i‘tâ ve mu‘âmelât-ı şettâya ve eşyâ-i ma‘lûme ve mechûle müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la [79b] ibrâ ve iskāt eyledik. Fîmâ-ba‘d vechen mine’l-vücûh ve sebeben mine’l-esbâb da‘vâ nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fi’s-sâmin min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Mustafa, Abdullah b. Mustafa, Mehmed b. Ahmed ve gayruhum.