Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 116 Hüküm no: 150 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Beşe b. Mehmed’in Hasan Reis’e olan borcunu ödemesi Ma‘rûz; Sefîne reislerinden Hasan Reis b. Süleyman hasmı Karadeniz-i Burgos ahâlîsinden olup Üsküdar’da misâfiren sâkin Süleyman Beşe b. Mehmed nâm kimesne ile mürâfa‘a-i şer‘ olduklarında mezbûr Hasan Reis târih-i i‘lâmdan iki ay mukaddem sâlifü’z-zikr Burgos’da yedimden istikrâz ve kendi mesârifine sarfla istihlâk eylediği iki yüz on guruş hakkımı taleb ederim deyü da‘vâ ettikde gıbbe’s-suâl mezbûr Süleyman Beşe cevâbında fi’l-hakīka cihet-i mezbûreden meblağ-ı merkūm iki yüz on guruş müdde‘î-i mezbûr Hasan Reis’e zimmetinde deyni olduğunu ikrâr ve i‘tirâf etmeğin mûcebince meblağ-ı merkūm iki yüz on guruşu müdde‘î-i mezbûr Hasan Reis’e edâ ve teslîme mezbûr Süleyman Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 27 Şa‘bân sene 1154