Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 117 Hüküm no: 153 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halkın kullanımında olan çeşme suyunu kendi hamamına akıtan Hamamcı Ömer hakkında şikayet Ma‘rûz; Sâdır olan fermân-ı âlîlerine imtisâlen arzuhâl-i mezkûr çavuşbaşı sâbık merhûm Ahmed Paşa’nın Üsküdar’da Pazarbaşı mahallesinde rızâ’en-li’llâhi te‘âlâ binâ eylediği mu‘allimhâne tahtında[ki] çeşmenin hüccet-i şer‘iyye mûcebince iki masûra suyu olup derûn-ı arzuhâlde Çinili hamamın hamamcısı olan Ömer türlü hîle ile kibâra intisâbı takarrubu [ile] suyu hamamına icrâ ve fukarâya gadr ve iki aydan mütecâviz mezbûr Ömer hamam mütevellîsi olan Sahyâr-ı cedîde? demekle ma‘rûf sâbıkā arpa emîni ve hâlâ Sultan kethudâsı imiş nâzır-ı vakfa istîzân etmedikçe adam vekîl irsâl eylemem ve eylediğim sûrette müfettiş tarafından kâtib ile varılır deyü iki aydan berü güçle işbu gurre-i Ramazan-ı şerîfde bozuvermişdir. Mezbûr Hammâmî Ömer itâ‘at-i emr-i âlî ve itâ‘at-i şer‘ eder makūlesinden olmayıp şerîr olmağla mütevellî-i vakf tarafından vekîl-i şer‘îsi ihzâr ve İstanbul su nâzırı tarafından usta suyolcu gelmeğe muhtâcdır ma‘lûm-ı devletleri oldukda bi’l-iltimâs huzûr-ı âlîlerine i‘lâm olundu. Fî-gurreti Ramazan sene 1154