Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 120 Hüküm no: 161 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un kendisine bakması şartıyla Sâliha’ya devrettiği vakıf menzildeki yarım hissesini geri aldığı Ma‘rûz; Sahibe-i arzuhâl Hanife Hatun hasmı Sâliha bt. Abdullah b. Abdülmennan tarafından sâbitü’l-vekâle vekîli olan zevci Mehmed muvâcehesinde mütevellî-i vakf tarafından vekîli Mustafa Dede hazır olduğu hâlde merhûm Aziz Hüdâî Efendi Vakfı mülhakātından olup Üsküdar’da Şücâ‘bağı nâm mahâlde vâki‘ bir tarafdan Çalık Halil mülkü ve bir tarafdan Mustafa Ağa mülkü ve iki tarafdan tarîk-ı âmm ile mahdûd iki bâb tahtânî oda ve iki sofa ve bi’r-i mâ ve kenîf ve bahçe ve avluyu müştemil olup senede yüz yirmi akçe icâre-i mü’eccele ve mu‘acceleli bir bâb vakıf menzilin nısfı benim ve nısf-ı âharı müvekkile-i mezbûrenin tasarrufunda olmağla târih-i i‘lâmdan dört sene mukaddem ben ölünceye değin görüp gözetmek şartıyla bilâ-bedel ma‘rifet-i mütevellî ile menzil-i merkūmda olan nısf hisseyi müvekkile-i mezbûre Sâliha’ya ferâğ ve tefvîz eylediğimden sonra müvekkile-i mezbûre Sâliha beni görüp gözetmeyip menzil-i merkūmdan ihrâc eylediğine binâ’en menzil-i merkūmda olan nısf hissemi taleb ederim deyü da‘vâ ettikde vekîl-i mezbûr cevâbında fi’l-hakīka hâl müdde‘iye-i mezbûrenin bâlâda tafsîl ve ayân eylediği vech üzere olup müdde‘iye-i mezbûreyi ölünceye değin görüp gözetmek şartıyla bilâ-bedel zevcesi müvekkile-i mezbûre Sâliha’ya tefvîz eyledikde ol dahi ber-vech-i muharrer tefevvüz ve kabûl eylediğini bi-tav‘ihî ikrâr ve i‘tirâf etmeğin mûcebince menzil-i mezkûrda olan nısf hissesini ma‘rifet-i mütevellî ile müdde‘iye-i mezbûre[ye] geri ferâğ [ve] tefvîze vekîl-i mezbûra tenbîh olunduğu mübâşir iltimâsıyla huzûr-ı âlîlerine i‘lâm olundu. Fî 12 Şevval sene 1154