Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 120 Hüküm no: 160 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülfem Hatun mahallesinde Mehmed’i döven, halkı da rahatsız eden Meto? İsmail’in ilâmla birlikte huzura sevk edildiği Ma‘rûz; Üsküdar’da Gülfem Hatun mahallesi sâkinlerinden Mehmed nâm şâbb-ı emredin babası ve vekîl-i şer‘îsi Mahmud Ağa hasmı Meto? İsmail muvâcehesinde târih-i i‘lâmdan üç gün mukaddem oğlum müvekkilim mezbûr Mehmed’i kantar ile arkasına ve sâir a‘zâsına bi-gayr-ı hakkın amden darb ve âr lâhık olacak elfâz-ı kabîh ile şetm ve hetk-i ırz eyledi deyü mûcebini ba‘de’d-da‘vâ ve’l-inkâr müdde‘î-i mezbûr müdde‘âsını udûlden Ali Ağa b. Ahmed ve el-Hâc Salih b. Abdullah nâm kimesneler şehâdetleriyle vech-i şer‘î üzere isbât edip şer‘an mezbûr İsmail’e ta‘zîr lâzım geldikden sonra mezbûr İsmail’in dükkânı civârında sâkin ehl-i sûkdan müseccelü’l-esâmî kimesneler mezbûr İsmail kendi hâlinde olmayıp ehl-i ırzın iyâl ve evlâdına hilâf-ı şer‘-i şerîf ta‘arruz ve hetk-i ırz etmekle ibâdullâhın emn ü râhatı ref‘ olmuşdur deyü muvâcehesinde ihbâr ve mezbûr İsmail i‘lâmıyla huzûr-ı âlîlerine irsâl olundu. Fî 4 Şevval sene 1154