Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 123 Hüküm no: 167 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yirmi sene önce esirlikten kurtulan Mustafa’nın annesinden intikal eden ve Berber Mustafa tarafından kullanılmakta olan ev hakkında işgal davası açmasının hükümsüz olduğu Ma‘rûz; Târih-i i‘lâmdan yirmi sene mukaddem esirlikten halâs olup Üsküdar’da sâkin olan sahib-i arzuhâl el-Hâc Mustafa Beşe arzuhâlde mezkûr mülk menzile vaz‘-ı yedi mütehakkık olan Berber Mustafa ile ba‘de’t-terâfu‘ Üsküdar’da Toygar Hamza mahallesinde vâki‘ ma‘lûmü’l-hudûd büyût-ı adîdeyi müştemil bir bâb mülk menzil anam müteveffiye Emetullah’dan müntakil mülk-i mevrûsum olup hâl-i sıgārımda ben esir olmağla esirlikten halâs olalı yirmi sene olup yirmi seneden beri muvâcehemde mezbûr Berber Mustafa bilâ-özr-i şer‘î menzil-i merkūma mülkiyet üzere mutasarrıf olmağla hâlâ menzil-i merkūmu taleb ederim deyü da‘vâ ettikde sahib-i arzuhâl el-Hâc Mustafa kendi takrîri üzere esirlikten halâs olalı yirmi sene olmağla bu müddetde bilâ-özr-i şer‘î sükût etmekle da‘vâsı memnû‘âtdan olup bu sûrette mezbûr Berber Mustafa’ya suâl dahi teveccüh etmemekle müdde‘î-i mezbûr el-Hâc Mustafa husûs-ı merkūm içün bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Bâkī emr men-lehu’l-emrindir. Fî 14 min-Şevval sene [1]154