Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 124 Hüküm no: 169 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman tarafından katledilen Hasan b. Mehmed’in diyetinin ödendiği Ma‘rûz-ı dâ‘î-i Devlet-i Aliyeleridir ki; Üsküdar’a tâbi‘ Nerdübânlı karyesinde mukaddemâ katîlen vefât eden Hasan b. Mehmed b. Abdullah’ın verâseti zevce-i menkûha-i metrûkesi sahibe-i arzuhâl Âmine Hatun ve sulbî sagīr oğulları Ömer ve Osman’a ve sulbiye sagīre kızı Sâliha’ya münhasıra olduğu şer‘an tahakkukundan sonra sıgār-ı mezbûrun tesviye-i emrine vasiyyesi olup zâtı ta‘rîf-i şer‘î ile mu‘arrefe olan anaları sahibe-i arzuhâl mezbûre Âmine Hatun meclis-i şer‘de müteveffâ-yı mezbûrun kātili olup mukaddemâ diyet-i kâmile hükmolunmağla ümerâ-yı deryâdan Ali Bey’in sefînesine vaz‘ olunan Süleyman tarafından vekîl-i sâbitü’l-vekâlesi Ali Efendi muvâcehesinde maktûl-i mezbûrun hükmolunan diyetini bi’l-asâle ve bi’l-vesâye müvekkil-i mezbûr Süleyman yedinden bi’t-tamam ve’l-kemâl ahz ü kabz eyledim diyet-i merkūmeden bir akçe ve bir habbe bâkī kalmamışdır dedikde vekîl-i mezbûr dahi tasdîk eylediği tescil-i şer‘î olunup mezbûr Süleyman’ın sebîli tahliye buyurulmak bâbında fermân-ı âlî ricâ ettikleri bi’l-iltimâs huzûr-ı âlîlerine i‘lâm olundu. Fî 18 Şevvâ[l] sene 1154