Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 356 Hüküm no: 358 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hasan ile kardeşi el-Hâc Ali’nin babalarının terekesinden dolayı olan davada sulh oldukları Vilâyet-i Anadolu’da İskilip kasabası mahallâtından Zeyve Mahallesi sâkinlerinden iken bundan akdem vefât eden Hasan Bey b. Abdullah b. Abdurrahman’ın verâseti sulbî kebîr oğulları el-Hâc Ali ve Mustafa nâm kimesnelere münhasıra olmağla tashîh-i mes’elesi iki sehmden i‘tibâr olunup sihâm-ı mezbûrdan bir[er] sehmi mezbûrân el-Hâc Ali ve Mustafa’dan her birine isâbeti tahakkukundan sonra mezbûr Mustafa meclis-i şer‘-i şerîf-i enverde tereke-i müteveffâ-i mezbûra bi’l-verâse vâzı‘u’l-yed olan karındaşı işbu bâ‘isü’l-kitâb mezbûr el-Hâc Ali mahzarında ikrâr ve takrîr-i kelâm edip babam müteveffâ-i mezbûrun terekesinden mezbûr el-Hâc Ali zimmetinde nukūd kırk guruş olmağla tashîh-i mezkûr üzere meblağ-ı mezbûrdan bana isâbet eden yirmi guruşu mezbûr el-Hâc Ali’den taleb ve da‘vâ eylediğimde beynimize muslihûn tavassut edip da‘vâ-yı mezkûremden beni mezbûr el-Hâc Ali ile on beş guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr on beş guruşu mezbûr el-Hâc Ali yedinden ahz u kabz eylediğimden sonra meblağ-ı bâkī-i mezbûra ve babam müteveffâ-i mezbûrun sâir terekesine müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Ahmed Bey b. Mahmud, Osman b. Hüseyin, İsmail Beşe b. Hüseyin, Molla Osman b. el-Hâc Mehmed, Solak Mustafa b. el-Hâc Mehmed, Kādızâde İbrahim Çelebi b. Mustafa, Mehmed Çelebi b. Abdullah, Abdullah Çelebi b. Mustafa, Hüseyin Çelebi b. Abdullah.