Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 356 Hüküm no: 357 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa ile Sarraf Haçador v. Bergon’un aralarındaki alacak davasında sulh oldukları Mahmiye-i İstanbul’da Divanyolu’nda vâki‘ Süleyman Paşa Hanı’nda sâkin sarraf tâifesinden Haçador v. Bergon nâm zimmî meclis-i şer‘-i şerîf-i enverde işbu bâ‘isü’l-kitâb Mustafa Ağa b. Abdullah b. Abdurrahman tarafından husûs-ı âti’l-beyânı tasdîka vekîli olan Çukadâr Ömer Bey b. Mustafa nâm kimesne mahzarında ikrâr ve takrîr-i kelâm edip müvekkil-i mezbûr Mustafa Ağa zimmetinde mûceb-i temessük iki yüz yirmi yedi guruş hakkım olmağla meblağ-ı mezbûru müvekkil-i mezbûr Mustafa Ağa’dan taleb ve da‘vâ eylediğimde beynimize muslihûn tavassut edip da‘vâ-yı mezkûremden beni müvekkil-i mezbûr Mustafa Ağa ile yüz yirmi guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz yirmi guruşu müvekkil-i mezbûr Mustafa Ağa yedinden tamamen ahz u kabz eylediğimden sonra mâ‘adâsı olan yüz yedi guruşa müteallika âmme-i da‘vâdan müvekkil-i mezbûr Mustafa Ağa’nın zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi kezâlik bana medfû‘u olan bedel-i sulh-ı mezkûra müte‘allika âmme-i da‘vâdan benim zimmetimi ibrâ-i âmm-ı râfi‘u’l-hısâm ile ibrâ ve iskāt eyledi dedikde [81a] gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çavuş Ağa b. Mustafa, İshak Ağa b. Mehmed, el-Hâcı Mehmed b. Abdullah, Mehmed Çelebi b. Abdullah.