Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 150 Hüküm no: 226 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın rızasıyla kızlarını yetiştirmek üzere İbrahim’e verdiği ve Âmine’nin muarazadan men edildiği Ma‘rûz, Derûn-ı arzuhâlde mezkûr müteveffiyye Fâtıma’nın anası sahibe-i arzuhâl Âmine dâmadı Mustafa muvâcehesinde Sütçü el-Hâc İbrahim hazır olduğu hâlde ba‘de’t-terâfu‘ mezbûr Mustafa sulbiye kızları Sâliha ve Ümmühani terbiye ve imsâk için mezbûr el-Hâc İbrahim’e mukaddemâ teslîm etmekle mezbûretân Sâliha ve Ümmühani’nin ben ana anası olup hıdâne benim olmağla mezbûretânı taleb ederim deyü da‘vâ ettikte mezbûr Mustafa cevâbında mezbûre Ümmühani on iki yaşında ve Sâliha on yaşında olup mezbûre Âmine’den hıdâne sâkıt olmuşlardır deyü ba‘de’d-def‘ ve’l-ikrâr müdde‘iyye-i mezbûre Âmine husûs-ı mezbûr için bî-vech mu‘ârazadan men‘ olunduktan sonra mezbûr Mustafa mu‘dim ve mu‘sir olup mezbûretânı infâkdan âciz olmağla terbiye ve imsâk için mezbûretânı rızâsıyla mezbûr el-Hâc İbrahim yanında ibkā ve bu vechile nizâ‘ları kat‘ olunduğu Üsküdar’da ba‘de’t-tescîl mübâşirleri Kapıkethudâsı Abdullah Beşe kulları iltimâsıyla huzûr-ı âlîlerine i‘lâm olundu. Fî 17 Zilhicce sene 1154