Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 151 Hüküm no: 230 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık’ın mutasarrıf olduğu menzilden Bacılar Tekkesi’ne giden yolda geçiş hakkı olduğunun anlaşıldığı Ma‘rûz, Sâdır olan fermân-ı âlîlerine imtisâlen bu fakīr Üsküdar’da Hüdâî Aziz es-Seyyid Mahmud Efendi -kuddise sırruhû- hazretlerinin Bacılar Tekyesi’ne giden tarîka varıp huzûr-ı Müslimînde ba‘de akdi’l-meclis Hüdâî Efendi Vakfı’nın hâlâ kāimmakam-ı mütevellîsi el-Hâc Ahmed Dede ve mürtezika-i vakf hazır oldukları hâlde vakfiye-i ma‘mûlün-bihâya ba‘de’n-nazar mahâll-i merkūm Bacılar Tekyesi’ne giden tarîk-i âm olmak üzere musarrah ve bin yüz kırk senesi târihiyle müverrah i‘lâm-ı şer‘î mûcebince mahâll-i merkūma mu‘âraza eden Şerife Rukiye’nin mahâll-i merkūmdan hakk-ı mürûru olmağla sahib-i arzuhâl Mehmed Sâdık’ın mutasarrıf olduğu menzilden tarîk-i mezbûra açılır <> altmış seneden mütecâviz iki kanadlı kapısı <> olup hakk-ı mürûru olduğunu vuk[ū]f-ı tâmmı olan gerek mürtezika-i vakıftan ve gerek ol tarîkde sâkin müseccelü’l-esâmî cemm-i gafîr-i Müslimîn mezbûre Şerife Rukiye’nin zevci ve vekîli el-Hâc Abdullah muvâcehesinde ihbâr ve kadîmi vech-i muharrer üzere olduğu lede’ş-şer‘i’l-enver sâbit ve zâhir olmağın “el-kadîmu yütreku alâ-kıdemihî” fehvâsınca zikrolunan kapıyı açtırıp sahib-i arzuhâlin mürûr ve ubûruna mümâna‘at etmemek üzere vekîl-i mezbûre tenbîh olunduğu ber-mûceb-i fermân-ı âlî huzûr-ı âlîlerine i‘lâm olundu. Fî-gurreti Muharremi’l-harâm sene 1155