Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 154 Hüküm no: 234 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber İsmail ve eşinin kötü hallerinden dolayı Hâce Hatun mahallesinden taşınması Ma‘rûz, Üsküdar’da Hâce Hatun mahallesinde imâm vekîli Ahmed Efendi ve ahâlî-i mahalleden Ömer Ağa ve Ahmed Ağa ve İbrahim ve Ali ve Müezzin Hasan ve sâir müseccelü’l-esâmî on nefer kimesneler yine mahalle-i mezbûre sâkinlerinden Berber İsmail muvâcehesinde bundan akdem mahallât defteri târihine gelince ırzlarıyla mukayyed ve defter târihinden sonra mezbûr Berber İsmail ve zevcesi Ümmi demekle ma‘rûf nâm zevcân kendi hâllerinde olmayıp menzillerine nâ-mahrem getirip fısk u fesâd etmeleriyle birkaç def‘a tenbîh olundukta mütenebbihler olmamışlardır, sû-i hâllerini ihbâr ve mahalleden ihrâclarını iltimâs ettiklerinde mezbûr Berber İsmail târih-i i‘lâmdan üç güne değin mahalleden ihrâc eylemek üzere meclis-i şer‘de ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 7 Muharremi’l-harâm sene 1155