Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 154 Hüküm no: 236 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavros köyündeki hamamda maktûl bulunan Külhâncı Musa’nın cesedinin keşfi Sâdır olan fermân-ı âlîlerine imtisâlen taraf-ı şer‘den irsal olunan Ahmed Efendi dâ‘îleri İstavros karyesi ustası Abdullah ve bostancıbaşı ağa tarafından Çukadâr Mehmed ve karye-i mezbûre civârında olan Çenger karyesi ahâlîlerinden müseccelü’l-esâmî cemâ‘at-i Müslimîn ile İstavros karyesinde olan hammâm içinde vâki‘ külhân ocağı önünde maktûl bulunan Külhâncı Musa’nın üzerine varıp a‘zâsına nazar ettiklerinde sol kulağı dibinden balta yarasıyla mecrûh bulunup ol vechile cerîhan katîl bulunduğu keşif ve mu‘âyene derûn-ı hamamda iki dellâk ve külhâncı-yı merkūm olup dellâktan usta kullarında mahbûs İsmail ve firâr eden Hüseyin maktûl-ı mezbûr ile hamam-ı merkūmda leyl ü nehâr sâkinlerdir deyü İstavros karyesi ahâlîsi ihbâr etmeleriyle vâki‘ hâli mezbûr dâ‘îleri mahâllinde tahrîr, ba‘dehû huddâm-ı şer‘den el-Hâc Mustafa ve el-Hâc İsmail ile meclis-i şer‘a gelip alâ-vukū‘ihî inhâ ve ihbâr maktûl-ı mezbûrun defnine izin verildiği ber-mûceb-i fermân-ı âlî huzûr-ı âlîlerine i‘lâm olundu. Fî 13 Muharremi’l-harâm sene 1155