Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 358 Hüküm no: 360 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Pir Ahmed Efendi Vakfı’nın mahlûl kalan tevliyetine Mustafa Ağa’nın tayin edildiği Mahmiye-i İstanbul’da Samatyakapısı kurbünde el-Hâcı Hüseyin Mahallesi’nde vâki‘ merhûm el-Hâc Pîr Ahmed Efendi nâm sâhibü’l-hayrın vakfında senede yüz elli akçe vazîfe ile mütevellî olan Mehmed Çelebi b. Abdullah vefât edip tevliyet-i mezkûre mahlûle olmağın yine mahalle-i mezbûre ahâlîsinden bâ‘isü hâze’l-kitâb Mustafa Ağa b. Abdullah nâm kimesne sâlih ve mütedeyyin ve mustakīm ve her vechile mahal ve müstahik idiği yine mahalle-i mezbûre ahâlîsinden zeyl-i kitâbda muharrerü’l-esâmî Müslimîn ihbârlarıyla hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri vakf-ı mezbûra vazîfe-i mersûme ile merkūm Mustafa Ağa’yı mütevellî nasb ve ta‘yîn buyurduklarında ol dahi tevliyet-i mezkûreyi kabûl ve merâsimini edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Osman Efendi b. Ali, İsmail Çelebi b. Hasan, Ahmed Çelebi b. Mustafa, el-Hâc Mustafa b. Hüseyin, Mehmed Beşe b. Osman, Süleyman Çelebi b. Ömer, Ahmed Çelebi b. Ramazan, Ali Ağa b. el-Hâc İbrahim, İsmail Çelebi b. İsmail, Mehmed Beşe b. Abdullah.