Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 358 Hüküm no: 361 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in vârisleri ile Mustafa Beşe’nin aralarındaki ev davasında sulh oldukları Mahrûse-i Galata muzâfâtından kasaba-i Kasımpaşa’da Sivrikoz Mahallesi’nde sâkine iken bundan akdem vefât eden Fâtıma bt. Mehmed nâm hatunun verâseti zevc-i metrûku İbrahim b. Mehmed ile sulbî kebîr oğulları Mehmed ile gāib ani’l-meclis Hasan’a ve sulbiye kebîre kızı <> işbu hâzıra bi’l-meclis İsmihan Hatun’a münhasıra oldukdan sonra müteveffâ[t]-ı mezbûrenin oğlu merkūm Mehmed kendi asâleten ve babası merkūm İbrahim tarafından vekâleten ve müteveffât-ı mezbûrenin kebîre kızı mezbûre İsmihan Hatun asâleten meclis-i şer‘-i şerîf-i enverde işbu bâ‘isetü’l-vesîka Mustafa Beşe b. Mehmed muvâcehesinde her biri da‘vâ ve takrîr-i kelâm edip mahalle-i mezbûrede vâki‘ ber-mûceb-i hüccet-i şer‘iyye ma‘lûmü’l-hudûd ve’l-müştemilât menzilin nısfı gāib-i mezbûr Hasan Kapudân’ın yedinde mülkü ve nısf-ı âharı mûrisemiz müteveffât-ı mezbûre Fâtıma’nın hayâtında yedinde mülkü olup ba‘de’l-vefât menzil-i mezbûrun nısfı intikāl-ı âdi ile bize intikāl etmişiken gāib-i mezbûr Hasan Kapudân, menzil-i mezbûrun mecmû‘u kendi mülkü olmak üzere işbu merkūm Mustafa Beşe’ye üç yüz yirmi beş guruş semen-i makbûza bey‘ ve teslîm ol dahi ber-vech-i muharrer iştirâ ve kabûl etmişidi hâlâ menzil-i mezbûrun nısfı vech-i meşrûh üzere bize intikāl etmekle menzil-i mezbûrdan nısf hisse-i irsiyyemizi mezbûr Mustafa Beşe’den bi’l-asâle ve bi’l-vekâle taleb ve da‘vâ sadedinde olduğumuzda beynimizde münâza‘ât-ı kesîre vâki‘ olmuş idi el-hâletü hâzihî beynimize muslihûn tavassut edip da‘vâ-yı mezkûremizden bizi seksen guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr seksen guruşu merkūm Mustafa Beşe yedinden tamamen ahz u kabz eyledik min-ba‘d menzil-i mezkûre müte‘allika âmme-i da‘vâdan merkūm Mustafa Beşe’nin zimmetini ibrâ ve iskāt eylediğimizde ol dahi kezâlik husûs-ı mezkûra ve bedel-i sulhe müte‘allika âmme-i da‘vâdan her birimizin zimmetini ibrâ ve iskāt eyledi dediklerinde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sânî aşere min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Beşe b. Ahmed, Hasan Beşe b. Mustafa, Osman b. Salih, Mustafa b. Ali, Mustafa b. Abdülbâki, Mehmed Çelebi b. Şa‘ban, Mustafa b. Ahmed, İbrahim Çelebi b. Ahmed, Abdullah Çelebi b. Ahmed.