Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 156 Hüküm no: 240 Orijinal metin no: [41a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim ve İbrahim’in Boğazkesen kalesinde kalebend cezasıyla cezalandırılmaları Musahhah Zâbiti ma‘rifetiyle mûcebince mezbûrlar Boğazkesen Kal‘ası’nda kal‘a-bend olmak buyruldu. Ma‘rûz, Diyarbekir vâlîsi vezîr-i mükerrem Ali Paşa hazretleri için ahâlî-i vilâyetten fermân-ı âlî ile yüz re’s bargir matlûb ve müşârün-ileyh hazretleri için tedârikde iken sütçü esnâfından cümle ahâlînin ittifâk [ve] ittihâdları üzere tâife-i mezbûre sekiz kârhâne ve her kârhânede dörder beşer bargirleri olup ikişer bargirden on altı re’s bargir ücretleri ahâlî tarafından verilmek üzere bir gün mukaddem nizâm verilip cümlesi râzı olduklarından sonra tâife-i mezbûreden el-Hâc İbrahim ve diğer İbrahim bu iki nefer verilen nizâma ve müşârün-ileyhin Üsküdar’da meksine bâ‘is ve meclis-i şer‘de bir vechile ilzâm ve sâire sirâyet ile ta‘tîline bâ‘is olmuşlardır, mezbûrân kılâ‘-ı sultânîden birine irsâl buyurulmak için mezbûrân hâlâ Üsküdar kolluğunda mahbûslar olmalarıyla vâki‘ hâl huzûr-ı âlîlerine i‘lâm olundu. Fî 17 Muharremi’l-harâm sene 1155