Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 160 Hüküm no: 248 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beykoz sakinelerinden Sâliha bt. Eyüb ile vasî Mustafa’nın vekili Hasan b. Mehmed arasındaki Örümce köyünde bulunan Velioğlu İbrahim Ağa Çiftliği’nin tapu davasında vekilin muarazadan men edildiği Ma‘rûz, Yoros kazâsına tâbi‘ kasaba-i Beykoz sâkinelerinden zâtı vech-i şer‘î üzere mu‘arrefe olan Sâliha bt. el-Hâc Eyüb nâm hatun sahib-i arzuhâl vasî Mustafa tarafından vekâleti sâbit Hasan b. Mehmed ile Dîvân-ı âlîlerinde ma‘kūd meclis-i şer‘de ba‘de’t-terâfu‘ Üsküdar’a havâle olundukta târih-i i‘lâmdan altı sene mukaddem li-ebeveyn kız karındaşım Eyüb fevt oldukta mutasarrıf olduğu Örümce karyesinde Velioğlu İbrahim Ağa Çiftliği demekle ma‘rûf arâzî tapuya müstahak oldukta hakk-ı tapu benim olup târih-i mezbûrda zevcim olup Mehmed Beşe hîleye sâlik ve bana olmak üzere arâzî-i mezbûru fuzûlî kendi üzerine tapu temessüğü alıp işbu hazır bi’l-meclis Sipâhi Mehmed Çavuş b. Haydar’dan temessük alıp iki sene mürûrunda Ada senesi şehîden vefât eyledikte zevce-i âhardan olan sulbî sagīr oğlu Ahmed’e vasî olan mezbûr Mustafa zabt murâd eyledikte tarlalarımızdır deyü iddi‘â eylediğimde ve iki yüz elli guruş tapuya verdiği ve nef‘an li’s-sagīr yüz guruş dahi mezbûr sagīr Ahmed için vasîyy-i mezbûr[a] teslîm eylediğimde vasîyy-i mezbûr dahi sipâhiden temessüğü sana alıvereyim deyü tarlaları bana teslîm ve hâlâ üç buçuk senedir zabt ve tasarruf ve zirâ‘at ve öşr-i resmin işbu sipâhiye beher teslîm ederim deyü iddi‘â eyledikte vasîyy-i mezbûrun vekîl-i mezbûr Hasan müdde‘iyye-i mezbûra üç buçuk seneden beri tarlaları zabt ve zirâ‘at ve öşr-i resmin sahib-i arz[a] edâ eylediklerini ikrâr lâkin senede kırkar guruş ücret ile istîcâr ve kabûl eylemişlerdir deyü def‘le mukābele edecek, def‘-i meşrûhuna mutâbık mübeyyine beyyine taleb olundukta mehl-i şer‘île emhel ve bi’d-defa‘ât imhâl olundukta ityân-ı beyyine etmemekle müdde‘iyye-i mezbûreden müdde‘âsı üzere şâhid taleb oldukta Beykoz kasabası ve Yalı karyesi ahâlîlerinden Abdurrahman Ağa b. Mehmed ve Hüseyin Bey b. Mustafa ve el-Hâc Ali b. İsmail ve sâir mazbûtü’l-esâmî Müslimîn cemm-i gafîr ve cem‘-i kesîr cümlemiz muvâcehesinde vasîyy-i mezbûr iki yüz elli guruş sipâhiye verilen tapu akçesi ve sagīr için yüz guruş cem‘an üç yüz elli guruş vasîyy-i mezbûr[a] teslîm ve rızâlarıyla çiftlik-i mezbûru işbu müdde‘iyeye teslîm ve tapu temessüğünü alıvermek üzere ve bi’d-defa‘ât müdde‘iye işbu Mehmed Çavuş b. Haydar arâzî-i mezbûrun sipâhisi olmağla mürâfa‘a ve tâlib ve da‘vâ ve hâlâ [43a] kendi mülkü olmak üzere üç buçuk senedir zabt ve tasarruf eder deyü tevâtür vech üzere muvâcehesinde edâ-i şehâdet-i şer‘iye edip hakk-ı tapu beş sene ye[dinde] olup zevc-i mezbûr hîle ile aldığı tapu temessüğü altı seneye varıp iddi‘âsına ve arâzî-i mezbûreyi zabta i‘tibâr ile hakk-ı tapu sâkıt <> olmamağla resm-i tapu ile hakk-ı makbûzu olup vekîl-i mezbûr mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu, bâkī <> emr hazret-i veliyü’l-emrindir. Fî 23 Muharrem sene 1155 İ‘lâm-ı mezbûrun tafsîlen hücceti dahi verilmiştir.