Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 161 Hüküm no: 249 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem ve Asvador arasındaki boşanma davasının anlaşma ile sonuçlandığı Ma‘rûz, Sahib-i arzuhâlin sadriye kebîre kızı Maryem Nasrâniyenin tarafından vekîl-i sâbitü’l-vekâlesi Papa Kazer zimmî derûn-ı arzuhâlde ismi mastûr Asvador zimmî ile Dîvân-ı âlîlerinde bir kaç def‘a terâfu‘ ve Üsküdar’a havâle olunduktan sonra mezbûr Asvador vekîl-i mezbûr muvâcehesinde müvekkile-i mezbûre Maryem tarafından anası sahibe-i arzuhâl mehr-i müeccel tesmiyesiyle akde mukaddemâ vekîl etmişidi, ol dahi vekâleten üç bin altı yüz otuz akçe mehr-i müeccel tesmiyesiyle bâ-izn-i şer‘ bana akd etmiş iken hâlâ mezbûre Maryem mehr-i mezkûr ile ber-vechin menkûhamdır deyü da‘vâ eyledikte ol dahi bi’l-külliye inkâr etmekle aslında vech-i meşrûh üzere anasını tevkîl eylediğine beyyine taleb olundukta ikāmet-i beyyine için mehl-i şer‘î verildikten sonra beynlerine muslihûn tavassut edip müdde‘î-i mezbûrun müvekkile-i mezbûr için masrûfu olan otuz guruşu müdde‘î-i mezbûra teslîm, ol dahi ahz u kabz edip müvekkile-i mezbûrede alâka ve medhali kalmayıp müvekkile-i mezbûreyi bâyinen tatlîk etmekle husûs-ı mezkûre müte‘allika âmme-i de‘âvî ve kâffe-i mutâlebâttan her biri âharın zimmetini ibrâ ve ıskāt edip kat‘-ı nizâ‘ ve fasl-ı husûmet eyledikleri rızâlarıyla Üsküdar’da tescîl olunup mübâşiri Mustafa Çavuş kulları iltimâsıyla huzûr-ı âlîlerine i‘lâm olundu. Fî 23 Muharremi’l-harâm sene 1155