Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 164 Hüküm no: 257 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeb Yadigar ile Mehmed, Mustafa ve Ali arasındaki koyun davasında vakıf mütevellisinden görüş alınması Ma‘rûz, Celeb tâifesinden sahib-i arzuhâl Yadigar zimmînin arzuhâlde mezkûr Gekbuze kurâlarından hasımlarını meclis-i şer‘a ihzâr için taraf-ı şer‘den mürâsele mûcebince Üsküdar ustası kulları mübâşeretiyle ihzâr olunan Gekbuze kazâsına tâbi‘ Dutmahal? karyesinden Mehmed ve Mustafa ve Köseler karyesinden Ali ile mürâfa‘a-i şer‘ olduklarında iddi‘â eylediği otuz sekiz re’s koyunun dört re’sini mukaddemâ mezbûr Mehmed yedinden kabz, bâkī otuz dört re’s koyun iddi‘â etmekle iddi‘â eylediği koyunlardan bir re’sini mezbûr Ali yolda bulup mezbûr Mustafa’ya teslîm, mezbûr Mustafa dahi istihlâk eylediği ikrârıyla sâbit ve bir koyunun kıymeti mezbûr Mustafa’dan lâzım gelip otuz üç koyun bâkī kalmağla usta tarafından me’mûr mübâşir Bostancı Ali Beşe ile mezbûrûn Mehmed ve Mustafa ve Ali’nin meclis-i şer‘de on dokuz re’s koyun yave olmak üzere sahib-i arzuhâl mevcûd olmadığından vakf tarafından mütevellî-i vakf bi’l-emâne kabz etmiştir ve on dört re’s ma‘lûmumuz değildir deyü ahâlî-i kasabanın mübâşir-i merkūma haber verdiklerini merkūmûndan her biri meclis-i şer‘de ihbâr ve mütevellî-i merkūm meclis-i şer‘de hazır olmamağla hakīkat-i hâl mütevellî-i vakıftan suâle muhtâcdır ve vakf-ı mezbûr Dârü’s-sa‘âdeti’ş-şerîfe nezâretinde olmağla müfettiş-i evkāf efendi tarafından ve mütevellîden suâl ve cevâb iktizâ eylediği bi’l-iltimâs huzûr-ı âlîlerine i‘lâm olundu. Fî 3 Saferü’l-hayr sene 1155