Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 165 Hüküm no: 259 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dericilerin ahi babası Süleyman’ın şikayeti ve debbağ hisseleri konusunda usulüne uygun hizmet edilmesi talebi Ma‘rûz, Ashâb-ı arzuhâl Üsküdar’da debbağ tâifesinden ahibabaları es-Seyyid Süleyman ve sâir müseccelü’l-esâmî meclis-i şer‘de yine tâife-i mezbûreden Ahmed muvâcehesinde iddi‘â ederler ki debbağ tâifesi hisseleri herkesin ma‘dûd deri olup ba‘zıları bi-nefsihi işlemeyip hisselerini cümle ustalar ma‘rifetiyle beher sene âhara istîcâr edip ve bu makūle olanlar cümlemiz ma‘rifetiyle olagelmiş iken mezbûr Ahmed kendi başka sahiblerinden olup benim yedimde temessük vardır deyü kadîme mugāyir hareket ve san‘atımızın ustalarına ihtilâline bâ‘is hareket ve her birimize itâle-i lisân etmekle fîmâ-ba‘d ahibabanın ve sāir ustalarıyla ma‘rifeti olmadıkca kadîmi üzere istîcâr olunup kadîme mugāyir hareket edenler ma‘rifet-i şer‘le ve zâbitleri ma‘rifetiyle tedîb olunmak üzere ahvâllerimize der-i devlet-medâr i‘lâm ve nizâm-ı kadîm üzere hareket olunmak için emr-i âlî ricâsında oldukları hasımları mezbûr Ahmed muvâcehesinde tescîl ve huzûr-ı âlîlerine i‘lâm olundu. Fî 3 Saferü’l-hayr sene 1155