Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 166 Hüküm no: 260 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın veraseti kızları Rukiye ve Haticeye kaldığından Hasan’ın borcunu adı geçenlere ödemesi Ma‘rûz, Derûn-ı arzuhâlde mezkûrü’l-ism Üsküdar’a tâbi‘ Kādı karyesinde sâkin iken bundan akdem fevt olan mandıra ustası Ali Ağa’nın verâseti sulbiye kebîre kızları Rukiye ve Hatice nâm hatunlara münhasıra olduğu şer‘an tahakkukundan sonra mezbûretân Rukiye ve Hatice’nin zâtlarını ba‘de’t-ta‘rîfi’ş-şer‘î meclis-i şer‘de hasımları olup arzuhâlde mastûrü’l-ism el-Hâc Hasan muvâcehesinde cihet-i deyn-i şer‘îden üç yüz altı guruş müteveffâ-yı mezbûrun mezbûr el-Hâc zimmetinde hakkı olup kable’l-ahz fevt oldukta meblağ-ı merkūm bize mevrûs olmağla taleb ederiz deyü da‘vâ ettiklerinde mezbûr el-Hâc Hasan cihet-i merkūma üç yüz guruş deyni olduğunu ikrâr ve i‘tirâf edip altı guruşunu inkâr etmekle altı guruş için mezbûretân şâhide havâle olunup mertebe-i ikrârı olan üç yüz guruşu edâ ve teslîm eylemek üzere mezbûr el-Hâc Hasan’a tenbîh olunup tahsili için Üsküdar kethudâyeri Mustafa kullarına teslîm olunduğu bi’l-iltimâs huzûr-ı âlîlerine i‘lâm olundu. Fî 24 Muharremi’l-harâm sene 1155