Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 173 Hüküm no: 277 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ın satıp parasını aldığı evi Ayşe’ye teslim etmesi Ma‘rûz Yoros kazâsına tâbi‘ Kavak kasabasında sâkine olup zâtı ta‘rîf-i şer‘î ile mu‘arrefe olan sahibe-i arzuhâl Âişe hasmı derûn-ı arzuhâlde ismi mezkûr zevc-i sâbıkı Hasan nâm kimesne ile dîvân-ı âlîlerinde ma‘kūd meclis-i şer‘de mürâfa‘a-i şer‘-i şerîf olduklarında mezbûr Hasan yedinde mülkü olup kasaba-i mezbûrede vâki‘ bir tarafdan Hacızâde menzili ve bir tarafdan Mehmed Reis menzili ve bir tarafdan eski câmi‘-i şerîf müezzininin vakıf menzili ve tarîk-ı âm ile mahdûd ma‘lûmü’l-müştemilât bir bâb mülk menzilinin sokak tarafından nısf-ı şâyi‘ini târih-i i‘lâmdan bir sene mukaddem iki yüz guruşa bey‘-ı bâtt-ı sahîh-i şer‘î ile bana bey‘ ve temlîk ve teslîm etdikde ben dahi minvâl-i muharrer üzere iştirâ ve temellük ve tesellüm ve kabûl ve semeni olan meblağ-ı merkūmu yedinden mezbûr Hasan tamamen ahz ve kabz edip menzil-i mezkûrun nısf-ı şâyi‘i benim mülk-i müşterâm olmuş iken teslîmden imtinâ‘ eder deyü da‘vâ etdikde gıbbe’s-suâl mezbûr Hasan cevâbında bi’l-külliye inkâr edicek müdde‘iye-i mezbûre Âişe ber-vech-i muharrer müdde‘âsını lede’t-tezkiye adâletleri zâhir olan kasaba-i mezbûre sâkinlerinden Ali b. Abdullah ve Mustafa b. Abdullah nâm kimesneler şehâdetleriyle muvâcehesinde vech-i şer‘î üzere isbât etmeğin mûcibince menzil-i mezkûrun nısf-ı şâyi‘ini mezbûre Âişe’ye teslîmi merkūm Hasan’a tenbîh olunduğu mübâşir el-Hâc Osman Çavuş kulları iltimâsıyla huzûr-ı âlîlerine i‘lâm olundu. Fî 22 Safer sene 1155