Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 175 Hüküm no: 280 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halk arasında huzursuzluk olmaması için Kartal Serdarı Mehmed’in serdarlığının sonlandırıldığı Ma‘rûz Sâdır olan fermân-ı âlîlerine imtisâlen vezîr-i mükerrem izzetli rıf‘atli yeniçeri ağası paşa hazretleri taraf-ı âlîlerinden ta‘yîn buyrulan Mehmed Çavuş kulları mübâşeretiyle taraf-ı şer‘den me’zûnen irsâl olunan Ahmed Efendi dâ‘îleri medîne-i Üsküdar’a muzâfe Kartal kasabasına varıp Harameyn-i muhteremeyn vakfından müceddeden binâ buyrulan cedîd hânda akd-i meclis-i şer‘-i âlî etdikde Kartal nâhiyesine tâbi‘ Dolayoba karyesi imâmı Veli Efendi ve cemâ‘atinden el-Hâc Ömer ve Resül Beşe ve Soğanlık karyesi imâmı es-Seyyid Abdullah Efendi ve cemâ‘atinden el-Hâc Mustafa ve Mehmed Beşe ve Hocaoğlu Mustafa ve İbrahim ve Salih ve Tuzla karyesi imâmı Mustafa Efendi ve cemâ‘atinden İsmail Beşe ve Hamza Beşe ve İbrahim Ağa ve Mehmed Beşe ve Yayalar karyesi imâmı Yusuf Efendi ve cemâ‘atinden Mehmed Beşe ve Ali Beşe ve Ahmed Beşe ve diğer Ali Beşe ve Şeyhli imâmı Ahmed Efendi ve cemâ‘atinden İbrahim Beşe ve Mustafa ve Salih ve Mehmed ve diğer Mehmed ve Yakacık karyesinden el-Hâc Hüseyin ve el-Hâc Ali ve İsmail Beşe ve Hasan ve Maltepe imâmı Hasan Efendi ve cemâ‘atinden el-Hâc Mustafa ve Kurt karyesinden Salih ve Mehmed ve Osman ve kasaba-i mezbûre imâmı İsmail Efendi ve imâm el-Hâc Mustafa ve ahâlî-i kasabadan müezzin Hasan ve Osman ve el-Hâc İbrahim ve Yusuf Beşe ve Süleyman Ağa ve Hüseyin Beşe ve Hoca Ahmed ve Hüseyin Beşe ve Ali Beşe ve Mustafa ve Molla Ali ve Mehmed ve Nalband Hüseyin ve Ebûbekir ve Osman ve Berber Mustafa ve Hüseyin ve Ahmed nâm kimesnelerden alâ-vechi’t-taharrî kasaba-i mezbûre sâkinlerinden derûn-ı arzuhâlde isimleri mastûr altıncı bölük el-Hâc Hasan ve Tebriz serdengeçdilerinden Ali ve yine altıncı bölüğün İbrahim ile sahib-i arzuhâl Serdar Mehmed’in keyfiyetleri tefahhus olundukda mezbûrûn el-Hâc Hasan ve Ali ve İbrahim için dâimâ kendi hâllerinde ve ırzları ile mukayyed ve şer‘-i şerîfe itâ‘at ve inkıyâd ve hilâf-ı şer‘ hareketleri olmayıp cümlemiz mezbûrlardan hoşnûd ve râzılarız ve her biri hüsn-i hâl üzeredir lâkin sahib-i arzuhâl Serdar Mehmed üç buçuk sene mukaddem kasabaya gelip te’ehhül ve bir müddet kasablık edip ihtilâl ve kasablıkdan ref‘ ve ba‘dehû Kartal serdârı olduğundan ahâlî-i kazâyı ihtilâle bâ‘is ve serdârlık hizmetinde olmak iktizâ etdikde Kartal kasabasında fesâd olması emr-i muhakkakdır ve bu vechile sahib-i arzuhâlden emniyet mümkün değildir deyü her biri muvâcehelerinde vech-i meşrûh üzere ihbâr etdiklerini merkūm dâ‘îleri mahâllinde tahrîr ba‘dehû huddâm-ı şer‘den Molla Ömer ve muhzır Veli ile meclis-i şer‘a gelip alâ-vukū‘ihî inhâ ve ihbâr ve fîmâ-ba‘d serdâr olmamak üzere meclis-i şer‘de ta‘ahhüd eylediği mübâşir-i merkūm iltimâsıyla vâki‘ hâl huzûr-ı âlîlerine i‘lâm olundu. Fî 2 min-Rebî‘ülevvel sene 1155