Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 177 Hüküm no: 285 Orijinal metin no: [48b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşalı Bayrakdâr Ali Beşe’nin Parsak’a para ve altın verdiğine dair iddiasına delil getiremediği Ma‘rûz Sahib-i arzuhâl Kasımpaşalı Bayrakdâr Ali Beşe Üsküdar’da sâkin hasmı Parsak nâm zimmî meclis-i şer‘e ihzâr ve muvâcehesinde mersûm Parsak zimmîye târih-i i‘lâmdan kırk iki gün mukaddem Kasımpaşa’da Hacı Berber nâm kimesnenin dükkânında mâlımdan otuz dokuz aded cedîd guruş ve dört aded Mısır zincirlisi altın ki cem‘an elli guruş şuhûd mahzarında ikrâz ve teslîm eylediğimde ol dahi istikrâz ve ahz edip hatta husûs-ı mezbûre Erzurum sâkinlerinden Ali b. İbrahim b. Hüseyin ve Bursa sükkânından el-Hâc İbrahim b. İbrahim b. Hasan asıl şâhidlerim olmağla bundan akdem mahâll-i mezkûra gider olduklarında altı nefer ma‘lûmü’l-esâmî kimesneler vech-i şer‘î üzere tahmîl eylemişler idi deyü meblağ-ı merkūmu ba‘de’d-da‘vâ ve’l-inkâr müdde‘î-i merkūm ityân-ı beyyine için istimhâl ve mehl-i şer‘î ile imhâl olunup müddet-i mehil tamamında ityân-ı beyyineye kādir olmayıp ve zimmî-i mesfûre yemîn vermeğe tâlib olmamağla müdde‘î-i merkūm Ali Beşe bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 7 Rebî‘ülevvel sene 1155