Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 180 Hüküm no: 290 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Irza tasallut eden Ahmet ve Ali’nin kalebendlikle cezalandırılması Ma‘rûz Sahib-i arzuhâl Halil derûn-ı arzuhâlde isimleri mezkûr olup zâbitleri ma‘rifetiyle ihzâr-ı şer‘-i şerîf etdirdiği Bostancıoğlu Ahmed ve Kulakoğlu Ali muvâcehelerinde târih-i i‘lâmdan bir hafta mukaddem gece ile mezbûrân Ahmed ve Ali refîkleri olan gāib ani’l-meclis Külahlıoğlu ile sekerâten menzilim kapısına gelip âlet-i harble beni katl kasdedip anama ve avratıma cimâ‘ lafzıyla şetm ve ırzımı hetk eylediler deyü ba‘de’d-da‘vâ ve’l-inkâr müdde‘î-i mezbûr da‘vâ-yı mezkûresini udûlden diğer Ali Beşe b. Osman ve Mustafa b. Mehmed ve Süleyman b. Mustafa şehâdetleriyle isbât etmeğin mûcibince mezbûrân Ahmed ve Ali’ye şer‘an tedîb lâzım geldiğinden mâ‘adâ mezbûrân kendi hâllerinde olmayıp ehl-i ırzın kapısına varıp ırzını hetk âdetleridir deyü sû’-i hâl üzere olduklarını karye ahâlîsinden mazbûtü’l-esâmî dört nefer kimesneler haber vermeleriyle ahâlî-i karyeden olup tedîb ve habsleri kılâ‘-ı sultânî[de] kalebend olunmak olmağla salâh-ı hâlleri zuhûr edince fermân-ı âlîleri için bi’l-iltimâs huzûr-ı âlîlerine i‘lâm olundu. Fî 20 Rebî‘ülevvel sene 1155