|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 249 Hüküm no: 346 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Halil Beşe b. İbrahim’in alacağı konusunda sulh bedeli karşılığı anlaşma sağladığı
Zümre-i râcilînden Halil Beşe b. İbrahim nâm râcil meclis-i şer‘-i hatîr-i lâzımü’t-tevkīrde Çukurhamamı kurbünde Mahallesi’nde sâkine Fâtıma bt. Abdullah nâm hatun tarafından husûs-ı âti’l-beyâna vekîl olup nehc-i şer‘î-i mu‘teber üzere vekâleti sâbite olan işbu râfi‘u’l-kitâb el-Hâc Mehmed Çelebi b. el-Hâc Himmet nâm kimesne mahzarında ikrâr ve takrîr-i kelâm edip mezbûr el-Hâc Mehmed’in müvekkilesi mezbûre Fâtıma zimmetinde cihet-i deyn-i şer‘îden otuz yedi riyâlî guruş hakkım olmağla meblağ-ı mezbûru taleb eylediğimde beynimizde münâza‘ât-ı kesîre vâkı‘a olmuş idi. El-hâletü hâzihî vekîl-i mezbûr el-Hâc Mehmed Çelebi meblağ-ı mezbûrdan benimle otuz riyâlî guruş üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr otuz riyâlî guruşunu merkūm el-Hâc Mehmed Çelebi yedinden ahz u kabz edip mâ‘adâsı olan yedi riyâlî guruşa müte‘allık da‘vâdan müvekkilesi mezbûre Fâtıma’nın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim, ba‘de’l-yevm mazmûn-ı kitâba muhâlif benden veyâ vekîlimden da‘vâ dahi sudûr ederse lede’l-hükkâmi’l-kirâm mesmû‘a ve makbûle olmasın dedikde mukırr-ı mezbûru kelimât-ı meşrûhasında vekîl-i merkūm el-Hâc Mehmed Çelebi vicâhen tasdîk ve şifâhen tahkīk edicek mâ-vaka‘a bi’t-taleb ketb olundu.
Fi’l-yevmi’s-sâbi‘ min-Cemâziyelâhire li-sene erba‘a ve sittin ve elf.
Şuhûdü’l-hâl: el-Hâc Mehmed b. el-Hâc Alihan, Ahmed Beşe b. Mehmed, Mehmed b. Osman Pîrî Beşe b. Hüseyin, el-Hâc Şa‘ban b. Ahmed, Ramazan b. Yusuf.
|