.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 250
Hüküm no: 347
Orijinal metin no: [51a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Lâlpâre bt. Abdullah’ın alacağından vazgeçtiği

Mahmiye-i İstanbul’da Çukurhamam kurbünde sâkine olan Lâlpâre bt. Abdullah nâm hatun meclis-i şer‘-i hatîr-i lâzımü’t-tevkīrde mahmiye-i mezbûre mahallâtından Hoca Hayreddin Mahallesi sâkinelerinden Fâtıma bt. Abdullah nâm hatun tarafından ikrâr-ı âti’l-beyânı tasdîka vekîl olup vekâleti nehc-i şer‘î üzere sâbite olan mezbûre Fâtıma’nın dâmâdı işbu râfi‘u’l-kitâb el-Hâc Mehmed b. el-Hâc Himmet mahzarında ikrâr-ı tâm ve takrîr-i kelâm edip müvekkile-i mezbûre Fâtıma zimmetinde cihet-i deyn-i şer‘îden seksen kıt‘a riyâlî guruş hakkım olup meblağ-ı mezbûrdan kırk beş riyâlî guruşu yedinde ahz u kabz edip meblağ-ı bâkī otuz beş riyâlî guruşdan müvekkile-i mezbûre Fâtıma’nın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim, ba‘de’l-yevm meblağ-ı mezbûra müte‘allik olan da‘vâdan fâriga olup vechen mine’l-vücûh müvekkile-i mezbûre ile da‘vâ ve nizâ‘ım kalmadı dedikde mezbûre Lâlpâre’nin ber-vech-i meşrûh cârî ve sâdır olan ikrâr ve takrîrin vekîl-i mezbûr el-Hâc Mehmed vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu.

Fi’l-yevmi’s-sâdis min-Cemâziyelâhire li-sene erba‘a ve sittin ve elf.

Şuhûdü’l-hâl: İbrahim Çelebi b. Davud, Rıdvan b. Abdullah, Ali el-Hâc Mehmed b. el-Hâc Alihan, Ahmed Beşe b. Mehmed, Halil Beşe b. Mehmed ve gayruhum.