Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 183 Hüküm no: 299 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador’un İbrahim’e olan borcunu ödeyeceğini taahhüd ettiği Ma‘rûz Üsküdar’da sâkin İbrahim hasmı Asvador nâm zimmî ile mürâfa‘a-i şer‘-i şerîf olduklarında merkūm Asvador zimmînin mezbûr İbrahim’e cihet-i deyn-i şer‘îden elli guruş deyni olduğu merkūm Asvador’un ikrârıyla şer‘an sâbit ve edâsına tenbîh-i şer‘î olundukdan sonra mezbûr İbrahim meblağ-ı merkūm elli guruşu târih-i i‘lâmdan otuz dört gün tamamına değin kendüye vermek üzere zimmî-yi mesfûru bi’t-terâzî tecîl ol dahi müddet-i merkūme tamamında edâya ta‘ahhüd edip ve meblağ-ı merkūmun edâsına Arslan ve Ohan ve Serkiz nâm zimmîlerin her biri kefil ve zâmin oldukları tescîl-i şer‘î olunup bi’l-iltimâs huzûr-ı âlîlerine i‘lâm olundu. Fî 26 Rebî‘ülevvel sene 1155