Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 184 Hüküm no: 302 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabatay ile Osman arasındaki alacak meselesinde anlaşma sağlandığı Ma‘rûz Sahib-i arzuhâl Osman’ın hasmı olup arzuhâlde mastûrü’l-ism olan Sabatay Yahûdî bundan akdem kıbel-i şer‘den yedine i‘tâ olunan hüküm i‘lâmı nâtık olduğu üzere mezbûr Osman zimmetinde cihet-i kefâletden sâbit mahkûmun-bih olan üç bin beş yüz yetmiş beş guruşa tavassut-ı muslihûn ile bin beş yüz guruş üzerine sulh ve bedel-i sulhdan bin guruş için mezbûr Osman’ın vâlidesi ve zâtı vech-i şer‘î üzere mu‘arrefe olan Ümmü Gülsüm emlâkinden Kefçe mahallesinde vâki‘ ma‘lûmü’l-hudûd olup mesfûr Sabatay’a bin guruşa bey‘ ve teslîm eylediği bir bâb mülk menzilinin semeni olan bin guruşa oğlu mezbûra teberru‘an takās ve beş yüz guruşun iki yüz guruşunu an-nakdin teslîm ve bâkī üç yüz guruşunu beher sene tamamında ellişer guruş Yahûdî-i mesfûra vâlidesi mezbûre Ümmü Gülsüm vermek üzere deyn temessüğü verip ve akrabâsından Hammâmî Menzilci Mustafa Ağa dahi beher sene tamamında altı seneye dek ellişer guruşun edâsına kefîl ve zâmin oldukda ve her biri âharın zimmetini ibrâ’ ve ıskāt eylediği tarafeynin rızâlarıyla Üsküdar mahkemesinde tescîl olunup ber-minvâl-i muharrer kat‘-ı münâza‘a eyledikleri mübâşir kulları iltimâsıyla huzûr-ı âlîlerine i‘lâm olundu. Fî 4 Rebî‘ülâhir sene 1155