Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 185 Hüküm no: 303 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem isimli kadının ahlaksızlığı nedeniyle mahalleden sürülmesi Ma‘rûz Üsküdar’da Selâmi mahallesinde sâkine Maryem nâm Nasrâniye kendi hâlinde olmayıp dâimâ ehl-i ırza ifk ve iftirâ ve hetk-i ırz eylediğinden mâ‘adâ kârhâneci olup cemî‘ fesâdı mürtekibe olmağla mezbûreden bir vechile emîn değiliz deyü izzetli bostancıbaşı ağa tarafından ta‘yîn olunan Mehmed Haseki kulları hazır olduğu hâlde ahâlî-i mahalle-i merkūmeden müseccelü’l-esâmî kırk neferden mütecâviz zimmîler merkūmenin muvâcehesinde sû’-i hâl üzere olduğunu ihbâr ve mersûme Maryem ahâlî-i mahalle lisânından ba‘zı kimesneler için verdiği arzuhâlde ahâlî-i mahallenin haberleri olmayıp mezbûreden bir vechile emîn olma[ma]larıyla tedîb buyurulmak için bundan akdem i‘lâm olunmuş idi. Hâlâ mezbûre Maryem yine ef‘âl-i mezkûreye cesâret ve fısk ü fesâda mübâşeret edip ahâlî-i mahalle emîn değiliz deyü teşekkî ve mahallelerinden ihrâc olunmak bâbında fermân-ı âlî ricâ eyledikleri bi’l-iltimâs huzûr-ı âlîlerine i‘lâm olundu. Fî 4 Rebî‘ülâhir sene 1155