Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 186 Hüküm no: 306 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine’den alacaklı olduğunu iddia eden Hatice’nin delil gösteremediği Ma‘rûz Sahibe-i arzuhâl Hatice hasmı olup mübâşir kulları ma‘rifetiyle ihzâr-ı şer‘ etdirdiği İbrahim ile mürâfa‘a-i şer‘-i şerîf olduklarında mezbûre Hatice târih-i i‘lâmdan beş sene mukaddem gāibetü ani’l-meclis Âmine bt. Abdullah b. Abdurrahman nâm hatuna mâlımdan yüz on guruş ikrâz ve teslîm eylediğimde ol dahi yedimden ahz ve istihlâk ve mukābelesinde emlâkinden bir çift altın bilezik ve bir pendül sâ‘at ve bir sîm gülâbdân ve buhûrdân ve bir sîm kuşağını bana irhân eyledikden sonra meblağ-ı merkūma mezbûr İbrahim kefîl olup hatta zikrolunan buhûrdanı ve gülâbdânı mezbûr İbrahim yedinden ahz eyledi deyü meblağ-ı merkūmu mezbûr İbrahim’den bi-hükmi’l-kefâle taleb ve da‘vâ eyledikde mezbûr İbrahim dahi gāibe-i mezbûre Âmine’nin müdde‘iye-i mezbûreden ancak yüz guruş iktirâz eylediğini ve buhûrdân ve gülâbdân kendi ahz eylediğini ikrâr lâkin kefâleti inkâr edicek müdde‘iye-i mezbûre Hatice müdde‘âsını beyân ve isbât için bi’d-defe‘ât imhâl olunup bir vechile ityân-ı beyyineye kādire olmayıp yemîn vermeğe dahi tâlibe olmamağla mezbûre Hatice bî-vech bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 6 Rebî‘ülâhir sene 1155