Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 186 Hüküm no: 305 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim ve İsmail arasındaki kısrak ve beygir ihtilafı İ‘lâmı mûcibince amel olunmak buyruldu. Ma‘rûz Sahib-i arzuhâl es-Seyyid İbrahim arzuhâlde zikrolunan İsmail ile mürâfa‘a-i şer‘-i şerîf olduklarında hâlâ mezbûr İsmail yedinde mevcûd olan bir re’s kısrak ve bir re’s kara iğdiş sahib-i arzuhâlin mülkü olduğu Mehmed b. Hasan ve diğer Mehmed b. Ahmed şehâdetleriyle zâhir olup lâkin mezbûrân es-Seyyid İbrahim arzuhâlde tasrîh eylediği vech üzere Kasabbaşı Hacı Mehmed kulları Kütahya’dan gelirken mezbûr es-Seyyid İbrahim’in altı re’s bargirlerine süvâr ve Üsküdar’a geldikde zikrolunan altı re’s bargirin iki re’sini Kütahya’ya sürücü ile irsâl ve iki re’sine etbâ‘ından biri binip Bosna’ya gider. Zikr olunan kara iğdiş kısrağı ra‘y için mezbûr İsmail’e verip hâlâ kendi dahi Trabzon’a gitdi deyü emir ve mezbûr İsmail dahi yedinden emânet verip hâlâ Trabzon’a âzim olduğunu iddi‘â etmekle mûcib-i şer‘îsini mezbûr İsmail hasm-ı şer‘î olmayıp mezbûr Hacı Mehmed’in huzûruna tevkīf iktizâ eder husûs-ı mezbûr merkūm es-Seyyid İbrahim mağdûr olmağla zikrolunan kısrak ve bargir kendüye teslîm olunmak üzere fermân-ı âlîleri buyurulur ise emir hazret-i veliyyü’l-emrindir. Fî 6 Rebî‘ülâhir sene 1155