Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 190 Hüküm no: 316 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İki kardeşin kiralaladıkları vakıf evin kullanımıyla ilgili aralarındaki ihtilafın giderildiği Ma‘rûz Sahib-i arzuhâl Ali karındaşı olup kapı kethudâsı mübâşeretiyle ihzâr-ı şer‘-i şerîf etdirdiği Ahmed ile el-Hâc Bedel Vakfı Mütevellîsi el-Hâc Mahmud Efendi hazır olduğu hâlde mürâfa‘a-i şer‘-i şerîf olduklarında vakf-ı mezkûr müsa[kka]fâtından olup arzuhâlde zikrolunan ma‘lûmü’l-hudûd bir bâb menzil icâreteyn-i ma‘lûmeteyn ile ale’l-iştirâki’s-seviy mezbûrânın taht-ı tasarruflarında olduğu ve mezbûr Ahmed târih-i i‘lâm şehri gurresine gelince on yedi ay şerîki mezbûr Ali’nin hissesini fuzûlî zabt ve müstakillen sâkin olup ve mezbûr Ali’nin nısf hissesinin beher şehir ecr-i misli kırk beş akçeden müddet-i mezbûrede cem‘an altı guruş ve kırk beş akçe olduğu mezbûr Ahmed’in ikrârıyla sâbit ve tarafeyne râci‘ olup mûcibince mezbûr Ahmed şerîki mezbûr Ali’nin nısf hissesine bî-vech mu‘ârazadan men‘, meblağ-ı merkūm altı guruş kırk beş akçeyi cânib-i vakf-ı mezkûra teslîme tenbîh olunduğu huzûr-ı âlîlerine i‘lâm olundu. Fî 12 Rebî‘ülâhir sene 1155