Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 190 Hüküm no: 317 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memleketine giden Mehmed Efendi ve annesinin Üsküdar’a dönüşüne izin verilmesi Ma‘rûz Sahib-i arzuhâl Mehmed Efendi dâ‘îleri ve vâlidesi arzuhâlinde zikreylediği vech üzere an-aslin Şehabeddin kazâsından olup kırk seneye karîb Üsküdar’da Selman Ağa mahallesinde mutavattın ve sâkin olup işbu sene-i mübârekede sıla-i rahîm için vâlidesi ve bir nefer hademesiyle kazâ-i mezbûra varıp iki ay mikdârı meks ve yine avdet murâd eylediklerini mahalle-i merkūme imâmı ve ahâlîsinden mazbûtü’l-esâmî sekiz nefer kimesneler ihbâr ve mezbûr hâlâ Üsküdar’da kısmet kâtibi olup avdetinde vâlidesi mezbûre ile bir nefer hademesine Üsküdar’a mürûruna mümâna‘at etmemek bâbında fermân-ı âlî ricâ eylediği huzûr-ı âlîlerine i‘lâm olundu. Fermân men lehu’l-emrindir. Fî 16 Rebî‘ülâhir sene 1155