Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 192 Hüküm no: 321 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Annesi başkasıyla evlenen Ali isimli çocuğa babaannesinin bakması Ma‘rûz Sahibe-i arzuhâl Âişe oğlunun oğlu olup arzuhâlde mastûrü’l-ism olan Ali nâm sagīrin anası Hatice zevc-i âhara mütezevvice olmağla hıdâne sâkıt ve mezbûrenin anası â‘mâ ve anasının anası cedde-i sâlis Âmine ile ba‘de’l-mürâfa‘a hâlâ mezbûre Âmine sagīr-i mezbûrun hıdânesi [hâdinesi] olup lâkin menzilinde durmayıp sagīr-i mezbûru muhâfaza ve terbiyeye kādire olmamağla kızı â‘mâ Fâtıma’nın yanında terk eylediği ve sagīr-i mezbûr babasının anası sahibe-i arzuhâl Âişe’nin yanına vermek her vechile evlâ olduğunu udûlden Ebûbekir ve Mehmed ve Mustafa ve Hasan ve Ali ve İbrahim nâm kimesneler ihbâr etmeleriyle sagīr-i mezbûr sahibe-i arzuhâl Âişe’nin yanında olmak üzere tenbîh olunduğu bi’l-iltimâs huzûr-ı âlîlerine i‘lâm olundu. Fî 18 R sene [1]155