Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 192 Hüküm no: 320 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacer’in Tahtakale’de tülbetçi esnafından Serkiz’e olan borcunu ödemesi Ma‘rûz İstanbul’da Tahtakale’de sâkin tülbentçi tâifesinden Serkiz zimmî hasmı olup Üsküdar’da sâkine ve zâtı mu‘arrefe olan Hacer nâm hatunu Üsküdar’da meclis-i şer‘a ba‘de’l-ihzâr ve’l-mürâfa‘a merkūme Hacer’in mersûm Serkiz yedinden iştirâ ve ahz eylediği zira‘ ve mikdârları beynlerinde ma‘lûm yemenî ve tülbend ve bogāsı bahâsından mesfûr Serkiz’e bin yedi yüz yirmi akçe deyni olduğu merkūme Hacer’in ikrârıyla sâbit olmağla mûcibince meblağ-ı merkūm bin yedi yüz yirmi akçe zimmi-i mesfûra edâya merkūme Hacer’e tenbîh olunup ve eşyâ-yı mezbûreden mâ‘adâ iddi‘â eylediği eşyâ-yı ma‘lûme bahâsı olan üç bin altı yüz kırk sekiz akçeyi merkūme Hacer inkâr etmekle beyân için Serkiz şâhide havâle olunduğu bi’l-iltimâs huzûr-ı âlîlerine i‘lâm olundu. Fî 14 Rebî‘ülâhir sene 1155