Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 193 Hüküm no: 324 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe ve İbrahim’in, amcaları Mustafa’nın evinde hak iddia etmesi Ma‘rûz Sahibe-i arzuhâl Âişe ve karındaşı İbrahim ammileri el-Hâc Mustafa ile huzûr-ı âlîlerinde akd olunan meclis-i şer‘de Aziz Mahmud Efendi Vakfı mütevellîsi vekîli el-Hâc Ahmed hazır olduğu hâlde mürâfa‘a olduklarında mezbûrân Âişe ve İbrahim vakf-ı mezkûrdan olup Üsküdar’a tâbi‘ Bulgurlu karyesinde vâki‘ ma‘lûmü’l-hudûd bir bâb vakıf menzile bi’l-icâreteyn mutasarrıf olan mezbûr el-Hâc Mustafa menzil-i mezkûrun nısf-ı şâyi‘ini bâ-ma‘rifet-i mütevellî babamız müteveffâ Hüseyin’e ferâgat eyledi deyü eyledikleri da‘vâlarını isbâta kādir olmamalarıyla bi’t-taleb mezbûr el-Hâc Mustafa tahlîf olunup menzil-i mezbûra mezbûrân Âişe ve İbrahim bilâ-beyyine bî-vech mu‘ârazadan men olunduktan sonra müteveffâ-yı mezbûr Hüseyin’in yine karye-i mezbûrede vâki‘ ma‘lûmü’l-hudûd ve’l-kıt‘a tarlaları oğlu mezbûr İbrahim’e intikāl-i âdî ile intikāl eylediği mezbûr el-Hâc Mustafa’nın ikrârıyla sâbit ve sahib-i arz yedine temessük verilmek üzere olduğu mübâşir kulları iltimâsıyla huzûr-ı âlîlerine i‘lâm olundu. Fî 19 Rebî‘ülâhir sene 1155