Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 365 Hüküm no: 369 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karagümrük’teki vakıf arsanın tasarrufunun Mehmed b. Abdullah’a tevcih olunduğu Bâ-imzâ-i hazret-i efendi. Ashâb-ı hayrâtdan merhûm es-Seyyid Ali nâm kimesnenin her Cum‘a gecesi türbesinde bir kandil îkād etmek üzere süknâsını bir recül-i sâlihe meşrûta vakfı olup mahmiye-i İstanbul’da Karagümrük kurbünde vâki‘ bir tarafdan merhûm Mesih Hasanpaşa Vakfı’ndan olan dekâkîn ve bir tarafdan Ali Efendi b. Ca‘fer ve bir tarafdan Mehmed Bey Abdullah mülkü ve bir tarafdan tarîk-i âm ile mahdûd muhterik menzil arsasına ber-mûceb-i şart-ı vâkıf bâ-hüccet tevcîh-i hâkimü’ş-şer‘le mutasarrıf olan Abdullah b. el-Hâc Hasan fevt olup arsa-yı mezbûre mahlûl olmağın sulehâdan olup süknâya muhtâc olduğu sikāt haberleriyle müte‘ayyin olan işbu sâhibü’l-kitâb Mehmed b. Abdullah’a tevcîh olunup tasarrufi’çün işbu vesîka-i enîka bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Fahrü’l-kuzât Musazâde Abdullah Efendi, Mehmed Çelebi b. Mehmed kethüdâ-yı Kar[a]zâde, Salih Çelebi b. Süleyman, Ali Çelebi b. Mehmed.