Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 195 Hüküm no: 328 Orijinal metin no: [54b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadıköy’de Haydaroğlu İbrahim’in kasaplık yapmasına izin verilmesi talebi Ma‘rûz Üsküdar’a tâbi‘ Kādı karyesi imâmı ve müezzini ve sâir ahâlîsinden mazbûtü’l-esâmî cemm-i gafîr ve cem‘-i kesîr kimesneler meclis-i şer‘de takrîr-i kelâm edip karye-i mezbûre sükkânından Kahvecioğlu Ahmed ve diğer Ahmed ve oğlu Mehmed ve İbrahim ve Veli Ahmed ve sâir on iki nefer kimesneler zuhûr ve eyyâm-ı sayfda bir kaç ay mikdârı koyun ve kuzu tedârik ve zebh ve narh-ı cârîsinden ziyâde bahâ ile füruht ve ibâdullâhı ızrâr edip vakt-i şitâda kasablığı küllen terk ve ibâdullâhın müzâyaka ve meşakkatlerine bâ‘is olmağın işbu meclis-i şer‘de olan kasab tâifesinden Hayadaroğlu İbrahim nâm kimesne yazın ve kışın koyun tedârik ve narh-ı cârî üzere füruht edip bir vechile ibâdullâha müzâyaka çekdirmemek üzere ta‘ahhüd edip ve cümlemiz merkūmu kasab olmasını iltimâs ve rahat etmemiz ile ve fîmâ-ba‘d mezbûr Haydaroğlu İbrahim karye-i mezbûrede kasablık edip zikrolunan on iki nefer kimesneler ve sâirleri müdâhale etmeyip kasablıkdan men‘ olunmaları cümlemize evlâ ve enfa‘ olmak üzere fermân-ı âlî iltimâs etmeler müsâ‘ade buyurulmak bâbında fermân-ı âlî ricâ eyledikleri iltimâslarıyla huzûr-ı âlîlerine i‘lâm olundu. Fî 23 Rebî‘ülâhir sene 1155