Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 196 Hüküm no: 329 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz davranışları ve ahlaksızlığı nedeniyle Arakıyeci el-Hâc Mehmed mahallesinde oturan Hüseyin’in mahalleden sürülmesi Ma‘rûz Üsküdar’da Arakıyeci el-Hâc Mehmed mahallesinde sâkin Ahmed hasmı Hüseyin ile mürâfa‘a-i şer‘-i şerîf olduklarında mezbûr Hüseyin târih-i i‘lâmdan bir hafta mukaddem vakt-i işâda mezbûr Ahmed’in anasına ve avratına cimâ‘ lafzıyla şetm ve ırzını hetk eylediği mahalle-i mezbûre sükkânından diğer Hüseyin b. İbrahim ve İbrahim b. Osman nâm kimesneler şehâdetleriyle mezbûrun muvâcehesinde vech-i şer‘î üzere sâbit olmağla şer‘an ta‘zîr lâzım geldiğinden mâ‘adâ mahalle-i mezbûre imâm ve ahâlîsinden mazbûtü’l-esâmî on nefer kimesneler mezbûr Hüseyin menziline ecnebi adamlar getirip şurb-i hamr ve fısk ü fesâd ve ekseriyâ kavga ve hengâme etmek âdet-i müstemirresi olup bundan akdem bi’d-defe‘ât tenbîh olundukda mütenebbih olmamağla mezbûrun ef‘âl ve ahvâlinden müteezzîlerdir deyü sû’-i hâlini ihbâr ve mahalle-i mezbûreden ihrâc olunmak bâbında fermân-ı âlî ricâ eyledikleri iltimâslarıyla huzûr-ı âlîlerine i‘lâm olundu. Fî 27 Rebî‘ülâhir sene 1155