Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 197 Hüküm no: 332 Orijinal metin no: [55a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli’yi kandırarak aldığı parayı ödemesinin Osman’a tenbih edilmesi Ma‘rûz Üsküdar’da müsâfiren sâkin Veli hasmı Osman muvâcehesinde mezbûr Osman târih-i i‘lâmdan iki hafta mukaddem sana bir tımar yaptırayım deyü beni iğfâl edip yedimden kırk beş guruşumu ahz u kabz ve kendi umûruna sarfla istihlâk eyledi deyü meblağ-ı merkūmu da‘vâ eyledikde mezbûr Osman dahi husûs-ı mezbûr için merkūm Veli yedinden ancak on altı guruş alıp kendi umûruna sarfla istihlâk eylediğini ikrâr ziyâdesi olan yirmi dokuz guruşunu inkâr edicek müdde‘î-i merkūm müdde‘âsını udûlden İbrahim b. Mustafa ve Abdullah b. Mehmed şehâdetleriyle vech-i şer‘î üzere isbât etmeğin mûcibince meblağ-ı merkūm kırk beş guruşu müdde‘î-i merkūm Veli’ye edâ ve teslîme mezbûr Osman’a tenbîh-i şer‘î olunduğu bi’l-iltimâs huzûr-ı âlîlerine i‘lâm olundu. Fî 2 Cumâdelûlâ sene 1155