Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 200 Hüküm no: 338 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horasancı ve kireççi dükkânıyla ilgili davada Avanis’in Haçok’u ibra ettiği Ma‘rûz Sahib-i arzuhâl Haçok zimmî hasmı olup çavuş kulları mübâşeretiyle ihzâr-ı şer‘ olunan Avanis zimmî ile mürâfa‘a-i şer‘-i şerîf olduklarında arzuhâlde zikrolunduğu vech üzere Üsküdar’da Selman mahallesinde vâki‘ bir bâb horasancı ve kireççi kârhânesi ve âlât-ı ma‘lûmesinin nısfını mâliki olan mesfûr Haçok târih-i i‘lâmdan bir ay mukaddem merkūm Avanis’e bey‘ eder oldukda semenini her ne zaman edâ eder ise mebî‘-i mezkûr yine kendinin olmak şartıyla iki yüz on altı guruş semen-i makbûza bey‘ ve teslîm eylediği şuhûd-ı udûlle sâbit oldukdan sonra mesfûr Avanis dahi fi’l-hakīka vech-i muharrer üzere olduğunu i‘tirâf ve medfû‘u olan meblağ-ı merkūm iki yüz on altı guruşu merkūm Haçok yedinden meclis-i şer‘de tamamen ahz u kabz ve mebî‘-i mezkûru red ve teslîm eyleyip ve kârhâne-i mezbûrun ba‘zı mesârifi için mersûm Haçok yedinden bi’t-terâzî beş guruş dahi alıp husûs-ı mezbûra müte‘allika da‘vâdan merkūm Haçok zimmînin zimmetini ibrâ’ eylediği huzûr-ı âlîlerine i‘lâm olundu. Fî 15 Cumâdelûlâ sene 1155