Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 203 Hüküm no: 346 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karga Hüseyin’in, Bulgurlu köyünde tasarrufunda olan vakıf tarlasında açılan kuyular ve su kanalları için aldığı para karşılığında bütün haklarından vazgeçtiği Ma‘rûz Vârid olan fermân-ı âlîlerine imtisâlen taraf-ı şer‘den irsâl olunan Mehmed Efendi dâ‘îleri merhûm Hüdaî eş-Şeyh Mahmud Efendi’nin vakfı olan Bulgurlu karyesi toprağında vâki‘ zikri âtî tarlaya varıp akd eylediği meclis-i şer‘de sahib-i fahrü’l-mevâli’l-izâm [sâhib-i] arzuhâl Saadeddin Efendi dâ‘îlerinin vekîl-i sâbitü’l-vekâlesi İsmail Ağa derûn-ı arzuhâlde mastûrü’l-ism olan Karga Hüseyin ile ba‘de’l-mürâfa‘a ve’l-münâza‘a merkūm Karga Hüseyin vakf-ı mezkûrdan olup taht-ı tasarrufunda olan etrâf-ı erba‘ası kendinin âhar tarlası ve arsa-i hâliye ve tarîk-ı âm ile mahdûd üç aded bi’r-i mâîyi müştemil bir dönüm mikdârı akd-i meclis-i şer‘ olunan tarlasın ve zikrolunan âhar kebîr tarlasından dahi bast-ı kanavât ve icrâ-yı mâ için tûlen üç yüz zirâ‘ ve arzan iki zira‘ mu‘ayyen ve ma‘lûm arsasını müvekkil-i mûmâ-ileyh hazretlerine yüz seksen guruş bedel mukābelesinde bâ-ma‘rifet-i mütevelli-i vakf-ı mezkûr ferâğ ve tefvîz eyledikde vekîl-i mezbûr dahi bi’l-vekâle tefevvüz ve kabûl eyledikden sonra merkūm Hüseyin bedel-i merkūm yüz seksen guruş ile zikrolunan bacalar hafr olundukda tarlasında mezrû‘ olup taklîb olunan alef zararı için dahi bi’t-terâzî on beş guruş ki cem‘an yüz doksan beş guruşu bi’t-tamam ahz u kabz eyleyip zikirleri mürûr eden tarla ve âb-ı râh ve hâsıl olan mâ-i lezîzde ve alef zararına müte‘allika âmme-i de‘âvî ve mutâlebâtdan müvekkil-i mûmâ-ileyh hazretlerinin zimmetlerini ibrâ’ ve ıskāt edip bu vechile kat‘-ı nizâ‘ eylediklerin mezbûr dâ‘îleri mahâllinde tahrîr ba‘dehû ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ eylediği huzûr-ı âlîlerine i‘lâm olundu. Fî 14 Cumâdelûlâ sene 1155