Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 203 Hüküm no: 347 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da oturan Ayşe ile Mehmed Efendi’nin anlaşarak boşandıkları (Muhâlaa) Ma‘rûz-ı dâ‘î; Tarafeynin rızâ ve iltimâslarıyla savb-ı şer‘den irsâl olunan Yahya Efendi dâ‘îleri sahib-i arzuhâl Âişe’nin zevci ve derûn-i arzuhâlde ismi mastûr olan Mehmed Efendi’nin Üsküdar’da vâki‘ menziline varıp akd eylediği meclis-i şer‘de mezbûre Âişe’nin tarafından hul‘ ve ibrâya vekîli olduğu İmâm Mehmed Efendi b. Hüseyin ve Mehmed Ağa b. İbrahim nâm kimesneler şehâdetleriyle sâbit olan Abdullah Ağa müvekkile-i mezbûrenin zevci merkūm Mehmed Efendi zimmetinde mütekarrer ve ma‘kūdün-aleyh olan on altı bin akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzere mezbûr Mehmed Efendi ile bi’l-vekâle muhâla‘a-i sahîha-i şer‘iyye ile muhâla‘a ve hukūk-ı zevciyete ve gayra müte‘allika âmme-i de‘âvîden her biri âharın zimmetini ibrâ ve bu vechle kat‘-ı nizâ‘ eylediklerini mezbûr dâ‘îleri mahâllinde tahrîr ve ba‘de[hû] ümenâ-i şer‘ ile meclis-i şer‘a gelip haber verdikleri mübâşir es-Seyyid Mehmed Çavuş kulları iltimâsıyla huzûr-ı âlîlerine i‘lâm olundu. Fî 20 Cumâdelûlâ sene 1155