Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 207 Hüküm no: 354 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Selami Efendi mahallesinde oturan Şehriban’dan bâyinen boşanan İsmail’in mehir ve nafaka ödemesi Ma‘rûz, Üsküdar’da Selâmi Efendi mahallesinde sâkine olup zâtı mu‘arrifeyn ta‘rîfleriyle mu‘arrefe olan Şehriban nâm hatun zevci İsmail muvâcehesinde mezbûr İsmail ile beynimizde adem-i imtizâca binâen târih-i i‘lâmdan bir gün mukaddem ben talâka tâlibe olup kavga ve müşâcere ederken mezbûr İsmail bana “seni istemem, evimden çık var git” deyip elfâz-ı kinâyâtdan olmağla hâlâ ben mezbûr İsmail’den bâyinen mutallaka olduğum ecilden mezbûr İsmail’in zimmetinde mütakarrer ve ma‘kūdün-aleyh olan iki bin akçe mehr-i müeccelimi ve nafaka-i iddet-i ma‘lûme ve me’ûnet-i süknâmı taleb ederim deyü da‘vâ eyledikde mezbûr İsmail dahi fi’l-vâki‘ mezbûre Şehriban iki bin akçe mehr-i müeccel tesmiyesiyle zevcesi olduğunu ikrâr lâkin bu minvâl-i muharrer tatlîkini inkâr edicek, müdde‘iyye-i mezbûre da‘vâ-yı mezbûresini udûl-ı Müslimînden el-Hâc Mustafa b. Hasan ve Ahmed Beşe b. Mustafa nâm kimesneler şehâdetleriyle isbât etmeğin mûcebince mezbûrenin talâkına ba‘de’l-hükm meblağ-ı merkūm iki bin akçe mehr-i müecceli ile nafaka-i iddet ve me’ûnet-i süknâsı için dahi bi’t-terâzî altı yüz akçe ki cem‘an iki bin altı yüz akçeyi mezbûre Şehriban’a edâ ve teslîme merkūm İsmail’e tenbîh olunduğu bi’l-iltimâs huzûr-ı âlîlerine i‘lâm olundu. Fî-gurreti Cumâdelâhire sene 1155